SMIGillánalmmái ja Redd Barna lihkostuvvan ovttasbarggus jagi 2015 Redd Barna kampánnjain
”Mun lean dás” álggii njukčamánus 2015 ja bisttii jagi lohppii. Ulbmil lei čalmmustit seksuála illastemiid mánáid vuostá, ja dan dehálašvuođa ahte rávesolbmot beroštit. Gillánalmmái bovdejuvvui searvat jo álggu rájes, ja dat mielddisbuvttii ahte ollugat min lahtuin besse juogadit iežaset muitalusaid ja rávvagiid vásáhusaideaset vuođul kapánnja ollu doaimmain.
Čálii Svein Schøgren
Gillánalbmás mii oaivvildit ahte rabasvuohta lea deháleamos vearjjuin okta go áigumuš lea dáistalemiin jávkadit seksuála illastemiid mánáid vuostá. Mii háliidit dahkat mánáid ja rávesolbmuid diđolažžan das ahte illasteamit dáhpáhuvvet miehtá áiggi ja ollu eanet go dan maid almmolaš logut čájehit. Seammás mii čuoččuhit ahte illastemiid sáhttá čađahit sihke almmái ja nisu, ja son ii leat balddonas gáhtas, muhto vaikke gii. Denne galget váhnemat heaitit leamen jáhkkilat, muhto bearráigeahččat mánáideaset. Ahte jahkkemeahttun ollu gánddat vásihit seksuála illastemiid lea eará dehálaš suorgi maid galggašii dutkat. Go albmát geat ieža leat vásihan illastemiid bajásšattadettiineaset muitalit iežaset muitalusaid, de dat leat mielde jávkadeamen tabuid, ja nu lea álkit earáide duostat muitalit illastemiid birra. Danne mii iežamet olmmošlaš gillámiin válljet loaiddastit ovdan mediain iežamet muitalusaiguin.
Álbmotčoahkkimat logi gávpogis Norggas
Redd Barna kampánnja álggahuvvui almmuhemiin dan dálus mas Litteraturhuset lea Oslos. Gillánalbmá stivrajođiheaddji lei okta ávžžuheddjiin. Seamma beaivvi son beasai muitalit iežas muitalusa TV2 God Morgen Norge-prográmmas, masa son oassálasttii Redd Barna váldočálliin Tove R. Vangiin. Maŋŋil su jearahalle TV2:s ja radio P4:s. Kampánnja čalmmustahttojuvvui álbmotčoahkkimiiguin logi gávpogis riikka miehtá, ja vuosttamussan Mandálas njukčamánu 11. beaivvi. Doppe lei galledeapmi joatkkaskuvllas ja álbmotčoahkkin Buen nammasaš kulturviesus. Gillánalbmá beaivválaš jođiheaddji, Jarle Holseter, juogadii iežas muitalusa ja muitalii makkár čuovvumušat leat olbmui illastemiid geažil. Mandála čoahkkimiidda serve maiddái neavttár Tobias Santelmann ja Redd Barna váldočálli Tove R. Vang. Máŋga media čuvvo dáhpáhusa ja jearahalle oassálastiid. Dat mediat ledje Fædrelandsvennen, Lindesnes avis ja NRK Sørlandet. Dovddus prográmmajođiheaddji Trude Teige lei mielde gulaheaddjin.
Mandála Redd Barna lágidii maid hivvodatčoahkkaneami mii lei gávpoga buot skuvllaid váhnemiid čoahkkin, mas Gillánalbmá stivralahttu, Ketil Kristoffersen, beasai juogadit iežas muitalusa. Ja oktanaga suinna Redd Barna juridihkalaš ráđđeaddi, Lars Due Tønnesen. Odd Sverre Pedersen ovddastii Gillánalbmá ”Jeg er her”-lágideamis sihke Drámmenis ja Kongsvingeris. Son lea máŋgii juogadan iežas muitalusa mediain ja VGTV jearahalai su ja Redd Barna golggotmánus.
Mánáidvuoigatvuođaid seminára
Gillánalbmá davimus lahttu, Bjørn Aasmoe, bargá daid olbmuid ráđđeaddin geat leat vásihan seksuála illastemiid. Son lea leamaš mediain rabasmielaid iežas illástanvásáhusaid birra maid son gillái bajásšattadettiinis. Borgemánus 2015 lei son ovdasága doalli mánáidvuoigatvuođaid semináras Litteraturhuset:s Oslos, mas son hálai heahpada birra. Dat lea váttis fáddá ollu illastuvvon olbmuide.
Skábmamánus son lei maid áidna ovdasága doalli mánáidvuoigatvuođaid iđitboradeamis ja eahketsemináras eaktodáhtolaččaid várás Troandimis. Fáddát doppe ledje ahte maiddái bártnit ja albmát illastuvvojit, ja mo illasteamit váikkuhit sidjiide.
Digitála muitalusat sosiála mediain
Beroštahtti gelddolaš prošeakta mii ollá hui ollugiidda sosiála mediaid bokte, almmuhuvvui skábmamánus. Vihttá albmá min organisašuvnnas bovdejuvvojedje muitalit iežaset muitalusaid digitála muitalussan. Dán buvttadeaddji lei Merete Grimeland, gean Redd Barna lei bálkáhan. Dát digitála muitalusat almmuhuvvojit juohke beaivvi olles mánu áiggi, ja dat leat ozahahtti, garra ja hearkkes muitalusat gánddaid ja nieiddaid birra geat vásihedje seksuála rihkkumiid mánnávuođas.
Fágabeaivi Romssa gávpogis
Skábmamánus lágidii Gillánalmmái fágabeaivvi Romssa gávpogis ovttasráđiid Redd Barnain. Bjørn Aasmoe doalai buot čoahkis nu ahte šattai beaktilis čalmmusteapmi seksuálalaš illastemiid váttisvuođain oppalohkái, mas illastuvvon albmát erenoamážit čalmmustuvvojedje. Doppe ledje ollu resursaolbmot ovdasága doallin, politiijas, mánáidsuodjalusas ja Redd Barna-organisašuvnnas. Daid lassin besse njealjis Gillánalbmás muitalit iežaset muitalusaid ja vásáhusaid eanet go 100 guldaleaddjái. Neavttár Bernt Bjørn lei gulaheaddji ja guoimmuhii heivvolaččat válljejuvvon divttaiguin ja lávlagiiguin. Mediat čájehedje stuorra beroštumi go guovloaviissat davvin ja NRK jearahalle Gillánalbmá beaivválaš jođiheaddji, Jarle Holseter, ja lágideami eará oasseváldiid.
Mii leat hirpmus ilus ovttasbarggu geažil Redd Barnain dán jagi, ja mii giitit ahte Gillánalmmái beasai leat mielde dás. Mii doaivut ahte beassat ain ovddas guvlui joatkit buori ovttasbarggu. Mii leat gullán ollu gillán albmáin ja oapmahaččain, ja vel fágsuorggi bargiin ge, mii nanne min jáhku dasa ahte oinnolašvuohta ja rabasmielalašvuohta lea buot deháleamos min barggus. Duohtalogut ja teoriijat leat buorit, muhto ii miige leat buoret go gullat daid olbmuid vásáhusaid geat leat rupmašii dovdan illastemiid, ja geat leat nákcen fas beassat juolgásiidda.