SMIUtsattmann.no lea dál iešbirgejeaddji
Maŋŋágo lei Forandringsfabrikkenis prošeakta, de háliidedje jođiheaddjit doppe ahte utsattmann.no galgá iežas stivret. Sin vuođđodoaibma lea bargat mánáiguin ja nuoraiguin, ja danne lea lunddolaš ahte gillán albmáid fierpmádat ovddida iežas deháleamos áššiid ieš.
Gillánalmmái lea dál sierra organisašuvdna. Stivra lea vuođđuduvvon ja vuosttamus bargamuš lea háhkat doaibmaruđaid vai mii sáhttit joatkit iežamet barggu.
Neahttasiidu mii gádju heakkaid
Gillán albmáid deháleamos bargamušain okta lea jođihit neahttasiiddu utsattmann.no. Ain cagget tabut ja heahpat gillájeaddji muitaleames ahte son lea seksuálalaččat illastuvvon, ja min vásáhus lea ahte lea váddásat oaččohit albmáid hállat go nissoniid. Lohkameahttun ollu albmát leat ožžon veahki muitalit iežaset seksuála illastemiid birra, dannego sii čihkosis leat lohkan earáid vásáhusaid birra dán neahttasiiddus. Diehtit ahte don it leat okto, gullat ahte earát sullasaš muitalusaiguin leat ceavzán ja ožžon buori eallima, lea dasa leamaš sivvan ahte sii leat mearridan doarrut vássánáiggi gopmiiguin. Odne leat muhtumat sis mielde jođiheamen utsattmann.no.
Diehtojuohkin fágaolbmuide
Eará suorgi mainna mii leat áŋgiruššan, lea muitalit dearvvašvuođasuorggi fágaolbmuide, NAV:i ja skuvlii mo mii leat vásihan váldojuvvot vuostá iešguđetlágan eiseválddiid luhtte, ja maid nuppástusaid dan hárrái mii háliidivččiimet. Muhtun vásáhusat leat buorit, muhto ollu sáhttá buoriduvvot. Dáid fágabeivviid mii háliidit dahkat vel buorebun, ja lágidit daid riikka miehtá nu ahte vel eanet olbmuide lea vejolaš oažžut dán máhtu.
Eastadanbargu
Min ráves gillán albmáide soaitá deháleamos bargu leat bargat eastadeaddji diehtojuohkimiin. Galledit skuvllaid ja eará sajiid gos mánát ja nuorat leat, muitalan dihtii iežamet vásáhusaid. Seksuála rihkkumiid galgá jávkadit hállamiin iige jávohaga orrumiin. Jus mii oaččohit bártniid ja nieiddaid duostat muitalit ahte sii illastuvvojit dahje leat illastuvvon, de mii diehtit ahte leat lihkostuvvan iežamet rahčamušain. Muitaleapmi lea namalassii mearrideaddji dehálaš dasa ahte dát olbmot ožžot buori eallima. Ja unnimus dehálaš ii leat dat ahte illasteaddji sáhttá bissehuvvot earáid illasteames.
Mii dárbbašit du veahki
Jus mii galggažat sáhttit joatkit dán heakkadehálaš barggu, de mii dárbbašit ekonomalaš veahki. Álggus mii dárbbašit doaibmaruđaid vai sáhttit bargat viidáseappot iežamet bargamušaiguin.
Jus don háliidat veahkehit stuorát dahje unnit supmiin, de gávnnat min kontonummara dás vuolábealde. Jus háliidat leat bistevaš veahkeheaddji mánnosaš supmiin, dalle mii leat hui giitevaččat.
Seastinbáŋkku sániiguin cealkki sáhtášii dadjat ahte juohke submi dahká mađđása.
Kontonummar: 3090 14 79468
Fitnodatnummar: 914 596 874
Dieđut vejolaš lahttuvuođa/doarjjalahttuvuođa birra maŋŋelis.