SMIGažaldat:
Mu bárdni illastuvvui njealji jagi agi rájes gávcci jagi agi rádjai go lei duddenbearraša luhtte. Illasteapmi dáhpáhuvai guokte vahkkoloahpa mánnui. Son álggii BUP:s johtit 8 jahkásažžan go illasteapmi fuomášuvvui. Son oaččui stoahkanterapiija mii doaimmai nuo ja ná. Ii lean miige bissovaš diliid go šattai menddo váttis mu bárdnái. Golbma jagi maŋŋá dárbbašeimmet bisáneami ja dikšun bisánii fáhkkestaga. Mun dáhtton eará divššu, psykologa ii gávnnahan man bahá illasteapmi lei leamaš. Go mun dáhtton eará divššu, de dajai BUP ahte son lei ollásit dikšojuvvon, ja dasa mun in eisege leat ovttaoaivilis.
Bárdnán gii dál lea 13 jagi boaris, rahčá iežas nájademiiguin, vašiin munnje, sosiála baluin, beroštumi čohkkemiin, váttisvuođaiguin iežas rupmaša ektui jna. jna., muhto BUP:s čuoččuhit ahte gánda lea ollásit dikšojuvvon ja oaivvildit ahte dainna mainna son rahčá ii boađe seksuála illasteamis. Muhto nu son dušše lea, go buot olbmot leat sierraláganat, dadje. Go mu gánda rahčá dákkár váttisvuođaiguin, lea go son dalle ollásit dikšojuvvon agi beaivái??
Balastattan ahte bárdnán ferte bajásšaddat stuorra váttisvuođaiguin njealji jagi illasteami geažil mii ii goassege dikšojuvvon rivttes láhkai. Dan mun jurddašan juohke beaivvi in ge dieđe maid sáhtežan vel dahkat?
Vástádus:
Ádden áibbas bures ahte don eadnin leat heađástuvvan bártnát dili geažil.
Mu mielas ášši lea nu ahte ii miige oro čájeheamen ahte du bárdni lea ollásit dikšojuvvon go sus leat nu ollu dakkár váttisvuođat go sus orrot leamen.
Ollásit dikšojuvvon lea maiddái dakkár dajaldat maid lea váralaš geavahit olbmo birra gii lea gillán seksuála illastemiid, mu dovdduid vuođul.
Vahágat ja traumat mánnávuođas sáhttet bistit eallima miehtá, muhto dikšun ja diđolašvuohta leat dehálaččat.
Šállu go munnje ii leat vejolaš addit dutnje fasihttavástádusa, muhto mun rávven du rahčat viidáseappot. Váldde oktavuođa bártnát fástadoaktáriin ja bivdde veahki ja rávvema. Dan maid bárdnát dárbbaša lea doarjaga ja buriid olbmuid iežas birra.
Sus soaitá leat heahpada ja sivalašvuođa dovdu, ja hui dehálaš lea sivahit illasteaddji ii ge iežas. Ii leat ovttage máná sivva ahte son lea illastuvvon.
Lihkusávaladagat dudnuide bártniin viidáseappot.
Dearvvuodaiguin Jarle
Ronny maid vástida
Mun ledjen masá 40 jagi ovdalgo dovddastin alccesan ahte ovdal ledjen vásihan seksuála illastemiid. Odne anán bahčagin go dan in dahkan ovdal. Amma dal bárdnát dál lea viehka jorbbodan. Son lea dakkár agis mas mánát galget lunddolaččat lahkanit seksuálalaš eallimii. Ovttas ovttaahksáččaiguin son galggašii geahččaladdat dan mii lea nu gelddolaš ja hipmudahtti. Muhto sus lea eretváldojuvvon dat olmmošvuoigatvuohta. Rávesolmmoš soaitá leat váldán bártnistat iešárvvu ja iešgudni. Nu mo don govvidat su, de oainnán das áššiid maid mun nu bures dovddan iežan mánnávuođas. Mun rávven du váldit oktavuođa Barnehus nammasaš ásahusain. Dakkára don gávnnat Hámaris, Birggonis, Kristiansánddas, Troandimis, Oslos ja Romssa gávpogis. Sis lea gelbbolašvuohta ja sii sáhttet dutnje addit dan veahki maid don dárbbašat. Dutnje soaitá buorebut heivemin váldit oktavuođa dakkár guovddážiin mii lea buot fylkkain. Buot váivviidisguin galgá bárdnát leat ilus go sus lea eadni guhte ”diehtá” ja ahte son sáhttá oažžut veahki ovdalgo rávesolbmoeallima hástalusat bohtet lassin.
Dearvvuodaiguin Ronny.