Min birra

Maid mii bargat?

Neahttasiiddus www.utsattmann.no ožžot sii geat leat gillán illasteami, sin oapmahaččat ja fágabirrasat dakkár dieđuid seksuála illastemiid birra, mat leat erenoamážit bártniid/albmáid várás. Doppe sáhtát lohkat eará gillájeddjiid muitalusaid, ja das lea gažaldat- ja vástádusbálvalus, maid lea vejolaš geavahit iežas nama haga.

Mii leat mielvázzit geat veahkehit gillán albmáid ja sin oapmahaččaid máhccat ruovttoluotta buori eallimii. Min jurdda lea ahte ii oktage dovdda eanadaga buorebut go son gii ieš lea váccašan doppe.

Mis leat čeahpes ovdaságadoallit geat galledit skuvllaid ja servet fágabeivviide ja bargobájiide. Geavahettiin iežamet historjjáid ja vásáhusaid mii rávvet eará gillájeddjiid, sin oapmahaččaid ja fágaolbmuid iešguđet oktavuođain.

Go mii geavahit iežamet historjjáid iešguđet mediain, mii háliidit buktit oidnosii dan ahte seksuála rihkkumat bártniid ja albmáid vuostá lea issoras stuorra ja váttis ášši. Mii duođaid jáhkkit ahte seksuála rihkkumiid galgá hállamiin goddit, ii ge dan jávohaga orrumiin

Neahttasiidu mii gádju heakka

Neahttasiiddu www.utsattmann.no jođiheapmi lea min deháleamos doaibma. Ain čatnasa garvvašeapmi ja heahpat muitaleapmái seksuálalaš illasteami birra ja mii navdit ahte dat lea ain váddásat albmáide. Lohkameahttun albmát leat ožžon veahki muitalit seksuála rihkkumiid birra, dannego sii čiegusvuođain leat lohkan earáid vásáhusaid birra dán neahttasiiddus. Go dihtet ahte sii eai leat okto, ja gullet ahte earát sullasaš muitalusaiguin leat birgen ja ožžon buori eallima, de dat veahkeha sin dáistalit vássánáiggi gopmiid vuostá. Dál leat muhtumat sis árjjalaččat mielde jođiheamen Gillánalbmá.

Diehtojuohkin fágaolbmuide

Ovdaságaiguin fágabeivviin ja bargobájiin mii muitalit dearvvašvuođasuorggi, Nav ja skuvllaid fágaolbmuide mo min leat váldán vuostá iešguđet ásahusain ja maid mii háliidivččiimet eará láhkai. Juoga lea buorre, muhto ollu livččii vejolaš buoridit. Min ulbmil lea ahte dát doaimmat galget šaddat ain buorebut ja ahte dat lágiduvvojit miehtá riikka, vai ain eanebut oččošedje dán máhtu.

Eastadanbargu

Eastadeaddji diehtojuohkinbargu lea Gillánalbmá áŋgiruššama váldosuorgi. Mii galledit skuvllaid ja eará sajiid gos mánát ja nuorat leat, juogadan dihtii iežamet vásáhusaid. Seksuála rihkkumiid galgá hállamiin hávkadit, ii ge čiegadit. Jus mii oaččohit bártniid ja nieiddaid duostat muitalit ahte sii illastuvvojit dahje leat illastuvvon, de mii leat lihkostuvvan iežamet áigumušain. Dat sáhttá leat áibbas mearrideaddjin dasa ahte sii sáhttet oažžut buori eallima. Ja erenoamážit ahte illasteddjiid vel lea vejolaš bissehit.

Organiseren

Gillánalmmái lea sierra ideála organisašuvdna, mii ii ávkkástala ruđalaš badjebáhcagiin. Stivrra jođiha stivra mii lea virgádan beaivválaš jođiheaddji gii galgá hálddašit beaivválaš doaimma. Doaimmat čađahuvvojit miehtá riikka, muhto váldokantuvra lea Flekkerøy nammasaš báikkis. Gillánalmmái ruhtaduvvo almmolaš ruđaiguin, lahttuvuođamávssuiguin ja honoráraiguin dakkár doaimmain go ovdaságaid doallamiin ja oassálastimiin iešguđet lágidemiide.

Sihkkarastin dihtii doaimma mii leat giitevaččat go olbmot servet doarjjalahttun, dahje addet ekonomalaš skeaŋkkaid kontonummarii 3090.14.79468 dahje Vipps-nummarii : 86670.

Gillánalbmá historjjá birra

2009 giđa oassálaste 20 bártni ja albmá, geat ledje gillán seksuála rihkkumiid, prošektii Gradert Info. Áigumuš lei addit ráđi eiseválddiide das maid lea dárbu dahkat vai eanebut dustet dieđihit ahte sii leat gillán seksuála rihkkumiid ja makkár veahkki doaimmašii buoremusat. Okta sin deháleamos ráđiin lei ásahit neahttabáikki, go nu uhccán albmát ohcet veahki veahkkevuogádagas. Dat galggai leat nationála neahttabáiki mainna lea nu álki go vejolaš oažžut oktavuođa. Dakkár neahttabáiki masa veahkkeásahusat sáhtte lágidit klieanttaid, ja dakkár neahttabáiki mas fágaolbmot sáhtte viežžat eanet máhtu ipmirdan dihtii buorebut bártniid ja albmáid geat leat gillán illasteami.

Ovttasbargoguoimmit

Seksuála illastemiid gillán albmát ledje njunnošis ovddideamen neahttabáikki, muhtumat sis ledje hui aktiiva oassálastit. Prošeavtta álggahii ja jođihii Forandringsfabrikken nammasaš ásahus, mii dan jođihii ovttas Senter for seksuelt misbrukte menn ja Kirkens Ressurssenter nammasaš guovddážiiguin. Dasa lassin ledje prošeaktajoavkkus mielde Reform ovddasteaddjit, FMSO stivra ja BUFdir. Mánáid-, nuoraid- ja bearašdirektoráhta ruhtadii neahttasiiddu utsattmann.no viidásat ovddideami jagiid 2015 ja 2016.

Háliidat go veahkehit?

Gillánalbmá doaimmahus ohcá oktavuođa eará gillán albmáiguin geat háliidit veahkehit čállosiiguin illasteami birra bártniid ja albmáid vuostá, áinnas ge muitalusain iežaset birra. Don válljet ieš čiegusvuođa dahje čájehit iežat ámadaju.

Jus leat sáhkkii, de sáddes máilla deike: post@utsattmann.no. Čális áinnas ge telefonnummara vai mii sáhttit ságastallat.