SMIDPS sáhttá fállat iešguđetlágan psykologa- ja divššárdivššu, dárbbu mielde. (Oktagaslaš poliklinihkalaš divššu, joavkodivššu, jándorvuđot divššu jna.) Almmolaš veahkkevuogádagas gáibiduvvo doavttirlágideapmi oažžun dihtii psykologa-/divššárdivššu. Don mávssát iešoasi 2185 ru rádjai. Dat mii lea dan supmi stuorát, máksá oadjokantuvra (muitte vurket guittiid).
Veadjá leat golmma mánu vuordináigi ovdalgo oaččut dikšofálaldaga.
Jus dárbbašuvvo fáhkkatlaš veahkki de sáhtát gulaskuddat doavttirfávttain doppe gos don orut, lea go johtti fáhkkatlaš dikšojoavkku fálaldat/fáhkkatlaš psykiatriijalaš fálaldat. Doavttirfákta sáhttá lágidit fáhkkatlaš dikšui.
Dus lea vejolašvuohta váldit oktavuođa priváhta psykologain šiehtadusa haga. Muhto das leat sierra hattit ja sáhttá leat divrras. Priváhta psykologat geain lea šiehtadus, leat subsidierejuvvon ja danne hálbbibut.